l'angolo della poesia siciliana: Lu Surci e Lu Rizzu ( Giovanni Meli)

Lu Surci e Lu Rizzu ( Giovanni Meli)

Facìa friddu, ed un surci  ‘ngriddutizzu

mentri sta tra la tana  ‘ncrafucchiatu,

senti a la porta lamintari un rizzu

chi ci dumanna alloggiu, umiliatu:

 

            “Jeu, dici,  ‘un vogghiu lettu, né capizzu;

mi contentu di un angulu, o di un latu.

O mi mettu a li pedi  ’mpizzu  ‘mpizzu,

basta chi sia da l’aria riparatu”.

 

            Lu surci era bon cori, e spissu tocca

A li bon cori agghiùttiri cutugna;

su’  assai l’ingrati, chi scuva la ciocca!

 

            Trasi lu rizzu, e tantu si cc’incugna

Chi pri li spini lu surci tarocca,

e dispiratu da la tana scugna:

 

            e di cchiù lu rampugna

l’usurpaturi, e jia gridannu ancora:

“Cui punciri si senti nèscia fora”.